Iniúchadh ar dhearcthaí múinteoirí i scoil lán-Ghaeilge ar fhorbairt na luathscríbhneoireachta agus na scríbhneoireachta chruthaithí i ranganna naíonán

Abstract

Tá an-thionchar ag dearcthaí múinteoirí ar fhorbairt na scríbhneoireachta ar na cleachtais agus modhanna oideolaíochta a bhíonn i bhfeidhm acu (Bingham & Hall-Kenyon, 2013; Gerde et al., 2019). Tá an-thionchar freisin ag timpeallachtaí foghlama ar fhorbairt scileanna litearthachta (Justice & Pullen, 2003). Trí chur chuige cáilíochtúil agus agallaimh leathstruchtúrtha, rinneadh iniúchadh sa taighde seo ar dhearcthaí múinteoirí ranganna shóisearacha i scoileanna lán-Ghaeilge ar fhorbairt na luathscríbhneoireachta agus ar na cleachtais a bhíonn i bhfeidhm acu chun scríbhneoireacht chruthaitheach i dteanga mhionlaigh a chothú. Rinneadh fiosrú freisin ar an tionchar atá ag an gcomhthéacs sochtheangólaíocht ar chleachtais na scríbhneoireachta chruthaithí sna ranganna shóisearacha. Cuireadh 11 oideachasóirí faoi agallamh. Rinneadh anailís ar shonraí na n-agallamh trí anailís théamach Braun agus Clarke (2012). Tugadh faoi deara ó thorthaí na n-agallamh go bhfuil béim curtha ar mhúineadh theanga ó bhéal na Gaeilge, agus ní chuirtear an bhéim chéanna ar an scríbhneoireacht ná an scríbhneoireacht chruthaitheach. Léiríodh go bhfuil tionchar ag an suíomh tumoideachais ar na cleachtais scríbhneoireachta cruthaithí sna ranganna naíonán. Tugadh faoi deara go raibh cleachtais na múinteoirí dírithe ar fhorbairt scileanna fisiciúla na scríbhneoireachta den chuid is mó.